ஹம்பாந்தோட்டை துறைமுகத்தில் இறக்குமதி செய்யப்பட்டு நிறுத்தி வைக்கப்பட்டுள்ள ஆடம்பர வாகனங்களை விடுவிப்பதற்கு விதிக்கப்படும் அதிகளவிலான கட்டணங்களை (detention fees) செலுத்த முடியாமல், இறக்குமதியாளர்கள் சுமார் 1,000 ஆடம்பர வாகனங்களை அங்கே விட்டுவிட்டுச் செல்லும் நிலை ஏற்பட்டுள்ளதாக இலங்கை சுங்க அதிகாரிகள் தெரிவித்துள்ளனர்.
தற்போது துறைமுகத்தில் சுமார் 40,000 இறக்குமதி செய்யப்பட்ட வாகனங்கள் நிறுத்தி வைக்கப்பட்டுள்ளதாக சுங்க அதிகாரி ஒருவர் தெரிவித்தார். மறு-ஏற்றுமதி (re-export) நடவடிக்கைகளில் ஏற்பட்ட தடங்கல்கள் மற்றும் துபாய் போன்ற இடங்களுக்கான கப்பல் போக்குவரத்தைப் பாதித்துள்ள மத்திய கிழக்கு மோதல்கள் காரணமாக பல வாகனங்கள் நீண்டகாலமாக அங்கேயேயுள்ளன. மறு-ஏற்றுமதிக்காக கொண்டுவரப்பட்ட வாகனங்களும் இதே நிறுத்திவைப்பு கட்டணப் பிரச்சினையை எதிர்கொண்டுள்ளன.
சுமார் ஆறு வருடங்களாக துறைமுகத்தில் நிறுத்தி வைக்கப்பட்டிருந்த 20 மில்லியன் ரூபாய் பெறுமதியான ஆடம்பர வாகனம் ஒன்றை விடுவிக்க உள்ளூர் இறக்குமதியாளர் ஒருவர் அண்மையில் முயன்றுள்ளார். எனினும், அதனை விடுவிக்க ஏறத்தாழ 50 மில்லியன் ரூபாய் வரை நிறுத்திவைப்பு கட்டணமாகச் செலுத்த வேண்டும் என அவரிடம் தெரிவிக்கப்பட்டுள்ளது.
இதனால் அந்த வாகனத்தின் மொத்தச் செலவு அதன் அசல் மதிப்பை விட மூன்று மடங்குக்கும் அதிகமாக உயர்ந்து, கிட்டத்தட்ட 70 மில்லியன் ரூபாயாக மாறியுள்ளது.
இந்தக் கட்டண விவரங்களை அறிந்த பின்னர், அந்த வாகனத்தை விடுவிக்க வேண்டாம் என இறக்குமதியாளர் முடிவெடுத்துள்ளதாக சுங்க அதிகாரி கூறினார்.
கட்டணங்கள் தொடர்ந்து அதிகரித்து வருவதால், பல இறக்குமதியாளர்களும் இதே போன்ற முடிவை எடுத்து வருவதாகவும், இதனால் நூற்றுக்கணக்கான ஆடம்பர வாகனங்கள் துறைமுகத்திலேயே கைவிடப்பட்டுள்ளதாகவும் அந்த அதிகாரி மேலும் தெரிவித்தார்.
