NDB வங்கியின் பிரம்மாண்ட மோசடியுடன் தொடர்புடைய சுமார் 13 பில்லியன் ரூபாய் பணம் வெளிநாடுகளுக்கு மாற்றப்பட்டு, அதன் மூலம் நாட்டின் வெளிநாட்டு நாணய இருப்பு (foreign exchange reserves) கடுமையாகக் குறைவதற்குக் காரணியாக அமைந்ததா என்பதைக் கண்டறியும் நோக்கில் பொலிஸ் நிதி குற்றப் புலனாய்வுப் பிரிவினர் (FCID) அறிக்கை ஒன்றை தயாரித்து வருகின்றனர்.
இது குறித்து பொது மக்கள் பாதுகாப்பு மற்றும் நாடாளுமன்ற விவகாரங்கள் அமைச்சர் ஆனந்த விஜேபால தெரிவிக்கையில், பேலியகொட பகுதியில் முச்சக்கரவண்டி ஒன்றிலிருந்து 30 மில்லியன் ரூபாய் மீட்கப்பட்டதை அடுத்து ஆரம்பிக்கப்பட்ட விசாரணைகள், NDB வங்கி உட்பட 2023 ஆம் ஆண்டிற்கு முந்தைய காலப்பகுதியையும் உள்ளடக்கிய ஒரு பரந்த மோசடி வலையமைப்பைக் வெளிப்படுத்தியுள்ளதாக தான் சமீபத்தில் நாடாளுமன்றத்தில் சுட்டிக்காட்டியிருந்ததாகக் குறிப்பிட்டார்.
மேலும், அந்த நேரத்தில் கிடைத்த தகவல்களின்படி, NDB நிதியின் ஒரு பகுதி வெளிநாடுகளுக்கு அனுப்பப்பட்டுள்ளதாக FCID தனக்குத் தெரிவித்திருந்ததாகவும் அவர் கூறினார்.
இந்த மோசடி நடவடிக்கையானது 2023 ஆம் ஆண்டு முதல் 13 வங்கிகளில் உள்ள 227 கணக்குகளின் ஊடாக, 26,108 தந்தி பரிமாற்றங்கள் (Telegraphic Transfers – TT) மூலம் மிகவும் திட்டமிட்டு அரங்கேற்றப்பட்டுள்ளது.
“வெளிநாடுகளில் உள்ள போலி கணக்குகளுக்கு தந்தி பரிமாற்றங்கள் (TT) மூலம் எவ்வளவு பணம் மாற்றப்பட்டது அல்லது இந்த வழியில் ஏதேனும் பணம் அனுப்பப்பட்டதா என்பதை உறுதியாகக் கண்டறிய FCID மேலதிக விசாரணைகளை நடத்தி வருகிறது,” என்று அமைச்சர் விஜேபால தெரிவித்தார்.
மறுபுறம், NDB வங்கியில் இடம்பெற்ற 13.2 பில்லியன் ரூபாய் பெறுமதியான இந்த உள்வட்ட மோசடி (insider fraud) குறித்து, மத்திய வங்கியின் (CB) மேற்பார்வையின் கீழ் ‘டெலொயிட் டச் டோமாட்சு இந்தியா எல்எல்பி’ (Deloitte Touche Tohmatsu India LLP) நிறுவனத்தால் நடத்தப்படும் சுயாதீன தடயவியல் தணிக்கை (independent forensic audit) இந்த மாத இறுதிக்குள் நிறைவடையும் என NDB வங்கி அதிகாரிகள் தெரிவித்துள்ளனர். இந்த விசாரணையானது கடந்த 10 ஆண்டுகால சந்தேகத்திற்கிடமான பரிவர்த்தனைகளை உள்ளடக்கியது என்பதுடன், இதன் இடைக்கால அறிக்கை ஏற்கனவே மத்திய வங்கியிடம் சமர்ப்பிக்கப்பட்டுள்ளது
