வெனிசுலாவில் அமெரிக்காவின் தலையீடு சர்வதேச சட்டத்தை மீறும் செயலாகும் என்பதையும், இது உலகைப் பாதுகாப்பற்றதாக்குகிறது என்பதையும் உலக சமூகம் தெளிவுபடுத்த வேண்டும் என்று ஐக்கிய நாடுகள் மனித உரிமைகள் உயர்ஸ்தானிகர் அலுவலகம் செவ்வாய்க்கிழமை தெரிவித்துள்ளது.
கடந்த வார இறுதியில் நடத்தப்பட்ட ஒரு திடீர் இராணுவ நடவடிக்கையின் மூலம் அமெரிக்கப் படைகள் வெனிசுலா தலைவர் நிக்கோலஸ் மதுரோவைப் பதவியிலிருந்து அகற்றின. போதைப்பொருள் பயங்கரவாதம் உட்பட நான்கு குற்றச்சாட்டுகளை மதுரோ அமெரிக்காவில் எதிர்கொண்டுள்ளார். இதனைத் தொடர்ந்து, மதுரோவின் துணைத் தலைவர் இடைக்கால ஜனாதிபதியாகப் பதவியேற்றுள்ளார்.
“எந்தவொரு நாட்டின் பிராந்திய ஒருமைப்பாடு அல்லது அரசியல் சுதந்திரத்திற்கு எதிராக நாடுகள் பலத்தைப் பயன்படுத்தக்கூடாது அல்லது அச்சுறுத்தக்கூடாது என்ற சர்வதேச சட்டத்தின் அடிப்படைத் தத்துவத்தை இந்த இராணுவ நடவடிக்கை சிதைத்துள்ளது என்பது தெளிவாகிறது,” என்று அந்த அலுவலகம் தெரிவித்துள்ளது.
இது குறித்து செய்தியாளர்களிடம் பேசிய அந்த அலுவலகத்தின் தலைமைப் பேச்சாளர் ரவினா ஷாம்தாசானி (Ravina Shamdasani), “இதனை வலியுறுத்த சர்வதேச சமூகம் ஒரே குரலில் ஒன்றிணைய வேண்டும்,” என்றார்.
இந்த இராணுவத் தலையீடு மனித உரிமைகளுக்கான வெற்றியல்ல, மாறாக இது சர்வதேச பாதுகாப்புக் கட்டமைப்பைச் சேதப்படுத்துவதோடு, ஒவ்வொரு நாட்டையும் பாதுகாப்பற்றதாக மாற்றுகிறது என்று அவர் கூறினார். “வலிமைமிக்கவர்கள் எதை வேண்டுமானாலும் செய்யலாம் என்ற செய்தியை இது உலகிற்குத் தெரிவிக்கிறது,” என்றும் அவர் மேலும் குறிப்பிட்டார்.
வெனிசுலாவின் எதிர்காலம் அந்நாட்டு மக்களால் மட்டுமே தீர்மானிக்கப்பட வேண்டும் என்று கூறிய அவர், அங்கு நிலவும் ஸ்திரமற்ற தன்மையும், மேலதிக இராணுவமயமாக்கலும் மனித உரிமைகள் நிலையை இன்னும் மோசமாக்கும் என்றும் எச்சரித்தார்.
