பணமோசடியைத் தடுக்க புதிய சட்டங்களைக் கொண்டுவர அரசு திட்டம்: மோசடியான டொலர் கடத்தலுக்கு முற்றுப்புள்ளி

சட்டவிரோத பணப் பரிவர்த்தனைகள் மூலம் பல மில்லியன் கணக்கான அமெரிக்க டொலர்கள் நாட்டிற்கு வெளியே கடத்தப்பட்டுள்ளதை அடுத்து, புதிய சட்டத் திருத்தங்களை அறிமுகப்படுத்துவதன் மூலம் பணமோசடி (Money laundering) தடுப்புச் சட்டங்களை வலுப்படுத்த அரசாங்கம் திட்டமிட்டுள்ளதாக பொதுப் பாதுகாப்பு அமைச்சர் ஆனந்த விஜேபால தெரிவித்துள்ளார்.

இறக்குமதி கொடுப்பனவுகள் என்ற போர்வையில் சுமார் 85 மில்லியன் அமெரிக்க டொலர்கள் நாட்டிற்கு வெளியே பரிமாற்றம் செய்யப்பட்டுள்ளதாக அமைச்சர் முன்னதாக நாடாளுமன்றத்தில் தெரிவித்திருந்தார்.

இது தொடர்பான ஒரு விசாரணையின்படி, ஒரு நிறுவனம் 953 பரிவர்த்தனைகள் மூலம் 26 நாடுகளில் உள்ள 256 நிறுவனங்களுக்கு 12.89 பில்லியன் ரூபாயை மாற்றியுள்ளது. இதன் மூலம் 42.7 மில்லியன் அமெரிக்க டொலர்கள் வெளிநாடுகளுக்குச் சென்றுள்ளதாக அவர் கூறினார்.

மற்றொரு விசாரணையில், வன்பொருட்கள் (Hardware), குளியலறை உபகரணங்கள் மற்றும் தங்கப் பொருட்கள் போன்றவற்றை இறக்குமதி செய்வதாகக் கூறி, பிறிதொரு நிறுவனம் நான்கு வங்கித் கணக்குகள் மூலம் சுமார் 13 பில்லியன் ரூபாயை வெளிநாடுகளுக்கு மாற்றியுள்ளதாகக் கண்டறியப்பட்டுள்ளது. இதன் மூலம் மேலும் 43 மில்லியன் அமெரிக்க டொலர் இழப்பு ஏற்பட்டுள்ளது.

எதிர்காலத்தில் இவ்வாறான குற்றங்களைத் தடுப்பதற்கான நடவடிக்கைகள் குறித்து ‘ பதிலளித்த அமைச்சர், இதற்கென புதிய சட்டமொன்று அறிமுகப்படுத்தப்படும் என்றார். வெளிநாட்டு நாணயப் புழக்கத்தை தளர்த்துவதற்காக நல்லாட்சி அரசாங்கத்தால் அறிமுகப்படுத்தப்பட்ட ‘2017 ஆம் ஆண்டின் 12 ஆம் இலக்க வெளிநாட்டு செலாவணி சட்டத்தில்’ (Foreign Exchange Act) உள்ள ஓட்டைகளைப் பயன்படுத்தியே இத்தகைய மோசடி பரிவர்த்தனைகள் செய்யப்பட்டுள்ளதாக அவர் மேலும் கூறினார்.

குறித்த சட்டத்தின் மூலம் ‘2006 ஆம் ஆண்டின் 5 ஆம் இலக்க பணமோசடி தடுப்புச் சட்டத்தின்’ சில விதிகள் நீக்கப்பட்டிருந்ததாகக் குறிப்பிட்ட அமைச்சர், அதில் வெளிநாட்டு செலாவணி விதிமீறல்களை பணமோசடிக்கான முதன்மைக் குற்றங்களாக (Predicate offences) வகைப்படுத்தும் விதிகளும் நீக்கப்பட்டிருந்ததாகச் சுட்டிக்காட்டினார்.

தேவையான தற்காப்பு நடவடிக்கைகள் குறித்து விவாதிப்பதற்காக, ஜனாதிபதி அனுரகுமார திஸாநாயக்க அவர்கள் நிதி புலனாய்வுப் பிரிவு (FIU) உள்ளிட்ட மத்திய வங்கி அதிகாரிகளுடன் விசேட கலந்துரையாடல் ஒன்றை நடத்தியுள்ளதாகவும் அமைச்சர் மேலும் தெரிவித்தார்.

“தற்போதுள்ள சட்டங்களில் புதிய திருத்தங்களாக இந்த விதிகளை நாங்கள் மீண்டும் அறிமுகப்படுத்துவோம். இதற்கான பணிகளை நிதி அமைச்சு (Finance Ministry) மேற்கொள்ளும்,” என்று அவர் கூறினார்.