அதிகாரத்தை ஒரு “பாதுகாப்பான, முறையான மற்றும் விவேகமான முறையில் மாற்றும்” காலம் வரும் வரை, அமெரிக்காவே வெனிசுலாவை “நிர்வகிக்கும் என்று ஜனாதிபதி டொனால்ட்டிரம்ப் தெரிவித்துள்ளார்.
வெனிசுலாவில் உள்ள அனைத்து அரசியல் மற்றும் ராணுவப் பிரமுகர்களும், மதுரோவுக்கு என்ன நடந்ததோ அது அவர்களுக்கும் நடக்கக்கூடும் என்பதைப் புரிந்து கொள்ள வேண்டும் என்று டிரம்ப் தெரிவித்துள்ளார்.
“வெனிசுலா மக்கள் மீண்டும் சுதந்திரம் பெற்றுவிட்டனர்,” என்று அவர் மேலும் கூறினார். இன்றைய தினம் அமெரிக்கா ஒரு “பாதுகாப்பான” மற்றும் “பெருமிதம் கொள்ளும் நாடாக” மாறியிருப்பதாகவும் அவர் தெரிவித்தார்.
:வெனிசுலா மக்களுடனான அமெரிக்காவின் ‘கூட்டுறவு’ அவர்களை ‘செல்வந்தர்களாகவும், சுதந்திரமானவர்களாகவும், பாதுகாப்பானவர்களாகவும்’ மாற்றும் அமெரிக்காவில் வசிக்கும் வெனிசுலா மக்கள் இந்த செய்தியால் “மிக்க மகிழ்ச்சி அடைவார்கள்” என்று அவர் மேலும் கூறினார். செய்தியாளர் சந்திப்பில் பேசிய அவர், “அவர்கள் இனி துயரப்படப் போவதில்லை,” என்று தெரிவித்தார்.
மதுரோவை ஒரு “சட்டவிரோத சர்வாதிகாரி” (illegitimate dictator) என்று டிரம்ப் சாடினார். அமெரிக்காவிற்குள் “மிகப்பெரிய அளவில் உயிர்கொல்லி சட்டவிரோத போதைப்பொருட்களை” கொண்டு வந்ததற்கும் மதுரோவே காரணம் என்று அவர் குற்றம் சாட்டினார். மேலும், ‘கார்டெல் டி லாஸ் சோல்ஸ்’ (Cartel de los Soles) எனும் போதைப்பொருள் கடத்தல் கும்பலை மதுரோவே வழிநடத்தி வந்ததாகவும் அவர் குற்றம் சுமத்தினார்.
மதுரோவும் அவரது மனைவியும் தற்போது ஒரு கப்பலில் நியூயார்க் நோக்கி வந்து கொண்டிருப்பதாகவும், அவர்களுக்கு எங்கு விசாரணை நடத்துவது என்பது குறித்து நியூயார்க் அல்லது மியாமி ஆகிய நகரங்களுக்கு இடையே விரைவில் ஒரு முடிவு எடுக்கப்படும் என்றும் டிரம்ப் தெரிவித்தார்.
அதன்பின்னர், பாதுகாப்புச் செயலர் பீட் ஹெக்செத் (Pete Hegseth) உரையாற்றினார். இன்றைய அதிகாலை நடவடிக்கையை “ஒரு பிரம்மாண்டமான கூட்டு ராணுவ மற்றும் சட்ட அமலாக்க சோதனை, இது எவ்வித குறைபாடுகளுமின்றி கச்சிதமாக (flawlessly) நிறைவேற்றப்பட்டது” என்று அவர் விவரித்தார்.
“ஈரானுக்கு வாய்ப்பு வழங்கப்பட்டது போலவே, மதுரோவிற்கும் வாய்ப்பு வழங்கப்பட்டது. ஆனால் அவர் வரம்பு மீறி விளையாடிவிட்டார் (effed around),” என்று ஹெக்செத் கடுமையான வார்த்தைகளில் குறிப்பிட்டார்
